Información na xornada de portas abertas na covid

No CEIP Ramón Cabanillas, dende as 9:00 ás 14:00, é onde o voso fillo/a pasará boa parte da súa escolarización, e connosco, en Infantil parte dos seus primeiros e máis importantes anos.

Neste documento recollemos as liñas básicas do funcionamento da etapa de Infantil agardamos que vos sexa de utilidade.

• Xerarase un ambiente físico de aprendizaxe tranquilo, afectivamente significativo e agradable, que lles permita ás criaturas sentirse cómodas, seguras e acollidas.
• A aprendizaxe e o coñecemento serán adquiridos a través dunha metodoloxía lúdica, na que as actividades se desenvolvan tendo en conta o ámbito experimental de cada neno e nena.
• O xogo será un elemento educativo de primeira orde para desenvolver os contidos, polo seu carácter motivador.
• Organizaremos os contidos atendendo a un “enfoque globalizador”.
• O alumnado avanzará na comprensión e aplicación das normas sociais que regulan o funcionamento dos xogos e actividades colectivas.
• Posicionarémonos como mediadores entre as criaturas e a cultura, atendendo á diversidade do alumnado.
• A partir da información dos coñecementos previos das criaturas, propoñeranse actividades que atraian o seu interese e que poidan relacionar coas súas experiencias anteriores. Para iso, planificaranse proxectos, actividades, tarefas e xogos que teñan un sentido claro
• En canto á organización do tempo, planificaranse períodos estables diarios e semanais. O que posibilitará a secuenciación e a planificación das diferentes propostas educativas.
• Nas planificacións recolleremos momentos adicados á observación, ao diálogo e á reflexión, á experimentación, á creación e a avaliación.
• Tentaremos que o alumnado se involucre nos proxectos con xogos e actividades que lle fagan observar, imaxinar, adiviñar, buscar alternativas, formular hipóteses.
• A distribución da aula farase establecendo diversos espazos, o que posibilita que o alumnado desenvolva ao mesmo tempo tarefas diferentes.
• Crearanse, por exemplo, recantos de biblioteca, de ordenador, de letras, da arte, de lóxico matemática, de xogo simbólico, de plástica, de arte, e aqueles outros relacionados cos diferentes proxectos da aula.
• Consideramos o espazo de fóra da escola como privilexiado para a ensinanza e a aprendizaxe da lectura e a escritura, xa que ofrece múltiples posibilidades de contacto co texto escrito –rótulos, carteis, tendas, escaparates, valos publicitarios-.
• A organización de proxectos consensuados, negociados e levados a cabo colectivamente polo grupo, a realización de asembleas para comentar acontecementos, as reunións en grupo para contar un conto ou cantar unha canción, constituirán valiosas estratexias.
• Para poder atender á diversidade do alumnado e á aprendizaxe de contidos de distinta natureza, organizamos diversas formas de agrupamento:
  • De gran grupo: cando se trata de planificar conxuntamente as actividades, lectura dalgúns textos, distribución de tarefas, explicacións, debates, asembleas.
  • De pequeno grupo: A organización en parellas acostuma ser moito máis rendible polo grao de implicación que comporta –elaborar listas, buscar información, escribir notas-.
  • A actividade individual.
• A partir da observación do que saben, podemos intervir en cada caso de xeito máis próximo aos seus coñecementos.
• Faremos unha observación do que vai ocorrendo nas aulas para poder facer un seguimento e unha intervención diferenciada e coherente coa realidade das mesmas.
• Profundizaremos nos procesos de adquisición das nocións matemáticas básicas, o descubrimento dos números e a súa achega á vida cotiá.
• A vivencia do medio social facilitaralles ás nenas e aos nenos un achegamento ás festas, tradicións e costumes, de forma que, ao finalizar esta etapa educativa, poderán ser capaces de participar e gozar nelas, valorándoas como manifestacións culturais do seu contorno.
• Partiremos dos esquemas de coñecemento do alumnado, en relación coa lectura e coa escritura, e do significado que lle atribúen.
• Potenciaremos o uso de de todo aquilo que o contorno nos ofrece para o achegamento da lingua escrita –cromos, folletos, carteis, periódicos, revistas-
• Para fomentar a lectura estableceremos distintas estratexias: lectura diaria de textos, organización de recantos de lectura, potenciación do uso da biblioteca de aula...